Kryeqyteti ukrainas, Kiev, është sulmuar me raketa nga Rusia, bën me dije kryebashkiaku i qytetit, Vitali Klitschko.
Sipas tij, mes objktivave që u goditën janë edhe dy ndërtesa banimi në rrethin qendror, Pechersk. Klitschko shtoi se disa prej raketave ruse janë rrëzuar me sukses, dhe se ekipet e shpëtimit janë në vendin e ngjarjes.
Ky sulm po ndodhë derisa liderët botërorë janë mbledhur në Bali të Indonezisë në samitin e G20-tës, apo grupit të vendeve më të industrializuara, ku kanë dënuar pushtimin rus të Ukrainës.
Presidenti ukrainas, Volodymyr Zelensky, u tha liderëve botërorë më 15 nëntor, përmes video-lidhjes, se koha për t’i dhënë fund luftës së Rusisë në Ukrainë është “tani”.
Kjo është hera e parë që G20-ta takohet prej se Rusia ka nisur pushtimin në fund të shkurtit.
Sulmi i sotëm me raketa mbi Kiev vjen dhe pas disfatës në Kherson, ku pas një pushtimi rreth 8 mujor forcat ruse u detyruan të tërhiqeshin.
