Putin e pranon: Situata në 4 provincat e aneksuara nga Moska në Ukrainë është shumë e vështirë
Presidenti i Rusisë, Vladimir Putin, ka pranuar sot se situata në katër rajonet e Ukrainës jugore dhe lindore, që Moska i ka aneksuar pa i vënë plotësisht nën kontrollin e saj, është “jashtëzakonisht e vështirë”.
“Situata në Republikat Popullore të Donetsk, Luhansk, si dhe në provincat Kherson dhe Zaporizhia është jashtëzakonisht e vështirë,” tha Putin.
Presidenti rus i bëri këto deklarata në një video drejtuar punonjësve të shërbimit të sigurisë (FSB), shërbimit të kundërzbulimit (SVR) dhe mbrojtjes së personave të rangut të lartë (FSO) me rastin e Ditës së Shërbimeve të Sigurisë që festohet në Rusi më 20 dhjetor.
Putin përshëndeti punën e këtyre shërbimeve që funksionojnë “në provincat e reja të Rusisë”, duke siguruar se “njerëzit që jetojnë atje, qytetarët rusë”, varen nga anëtarët e shërbimeve të sigurisë për “mbrojtjen” e tyre.
⚡️”The situation in Donetsk and Luhansk People’s Republics, Kherson, Zaporizhzhia regions is extremely difficult”, – Putin. pic.twitter.com/ARNvqqwWnl
— FLASH (@Flash_news_ua) December 20, 2022
Vetë presidenti rus, një ish-agjent i shërbimeve sekrete të Bashkimit Sovjetik (KGB), kërkoi nga shërbimet e kundërzbulimit që të ishin tepër të kujdesshëm.
“Është e nevojshme të shtypen me vendosmëri veprimet e shërbimeve sekrete të huaja dhe të identifikohen efektivisht tradhtarët, spiunët dhe sabotatorët”, nënvizoi ai.
Kujtojmë se në shtator Moska njoftoi aneksimin e katër rajoneve të Ukrainës: Donetsk, Luhansk, Zaporizhia dhe Kherson, të cilat ushtria ruse i kontrollon pjesërisht pas mbajtjes së “referendumeve”.
Megjithatë, në nëntor Ukraina arriti të rimarrë Khersonin, kryeqytetin e provincës me të njëjtin emër, duke i dhënë një goditje të rëndë Moskës.
