Me rastin e Ditës Globale të Zgjedhjeve, Komisioni Qendror i Zgjedhjeve dhe prezenca e OSBE-së në Shqipëri organizuan një seri aktivitetesh përqendruar rreth votuesve të rinj, me qëllim për të rritur pjesëmarrjen e tyre në zgjedhje.
Prezenca dhe KQZ-ja, ftuan të rinj nga i gjithë vendi për të krijuar video dhe slogane për zgjedhjet e përgjithshme të 25 prillit dhe shpërbleu katër fituesit e konkursit në një ngjarje të organizuar nga Komisioneri Shtetëror për Zgjedhjet Ilirjan Celibashi dhe Shefi i Prezencës, Vincenzo Del Monaco. Fituesit shkëmbyen mendime me Celibashin dhe Del Monaco mbi rritjen e rolit të të rinjve në proceset demokratike, mbi rëndësinë e pjesëmarrjes së tyre në zgjedhje dhe ndikimin që të rinjtë mund të sjellin në jetën politike të vendit.
”Përfshirja e të rinjve përmes konkursit për videon, grafikën dhe sloganin më të mirë pë zgjedhjet në celebrimet e Ditës Botërore të Zgjedhjeve, ishte një rast i mirë për të përcjellë mesazhe për angazhimin e të rinjve në procesin zgjedhor dhe të marrin pjesë në votime”, tha Celibashi gjatë vlerësimit të të rinjve që morën pjesë në konkurs.
“Angazhimi i të rinjve në proceset demokratike është një përbërës i rëndësishëm i punës së Prezencës së OSBE-së. Të rinjtë duhet të shkojnë të votojnë Ditën e Zgjedhjeve, të bëhen pjesë e procesit. Ju keni një rol të fortë në të ardhmen e vendit, bëjeni zërin tuaj të dëgjohet”, tha ambasadori Del Monaco.
Celibashi dhe Del Monaco shfrytëzuan rastin për të nxitur të gjithë votuesit të kontrollojnë emrat e tyre në listat e votuesve dhe të kenë një dokument të vlefshëm identifikimi për të qenë në gjendje të votojnë në 25 prill.
