Basha akuza Berishës: “Non grata-t” po sulmojnë hetimin e inceneratorëve për përfitime elektorale

Anëtarët e PD në Komisionin Hetimor Parlamentar, kanë publikuar të tjera fakte, që sipas tyre provojnë përfshirjen e Arben Ahmetaj, zv.Kryeministër, në aferën e inceneratorëve.

Përmes një deklarate të publikuar nga zyra e shtypit e partisë që drejton Lulzim Basha, thuhet se përpjekjet e “non gratave” të shpallura dhe të pashpallura për të sulmuar komisionin kanë për qëllim mbrojtjen e individëve të korruptuar në këmbim të mbështetjes financiare dhe elektorale.

“Aleanca e të korruptuarve nuk do ta ndal PD-në t’i shkojë deri në fund zbardhjes së kësaj afere. Çdo ditë është dhe më e qartë se si janë përfshirë ministra e funksionarë të lartë në shkelje të çdo ligji. Një ndër ta është Arben Ahmetaj.

Koncesioni i inceneratorit të Elbasanit i është dhënë “Albtek Energy” me “negocim pa shpallje”, procedurë që ligji nuk e parashikon.

Arben Ahmetaj ka dhënë miratimin për t’i dhënë koncesionin kompanisë “Albtek Energy” me një procedurë që është në kundërshtim me ligjin.

Të tre inceneratorët nuk kanë pasur leje mjedisore.

Koncensoni iu dha një kompanie që nuk ka asnjë ditë eksperiencë në fushën e incenerimit.

Edhe sot vazhdojmë të paguajmë para për procedura korruptive, për kontrata korruptive.

430 milionë euro kanë shkuar në xhepat e pushtetarëve të lidhur me Klodian Zoton, Mirel Mertirin, Stela Gugallën.

Edi Rama, Ëngjëll Agaçi, Arben Ahmetaj, Damjan Gjiknuri, Lefter Koka, Erjon Veliaj kanë vepruar si një grup i strukturuar kriminal”, thuhet në deklaratë.