Shefi i kabinetit të kryetares së LSI, Eriol Braimllari ka komentuar raportin e ”Freedom House”, ku përmes një postimi në facebook, thotë se e pasqyrojnë Shqipërinë si një pronë private të Edi Ramës, ku shteti i së drejtës është zëvendësuar me pushtetin e individit, i cili lartësohet mbi institucionet dhe rendin demokratik. ”Rritja e vazhdueshme e tensionit social, rënia ekonomike, shpopullimi i vendit, mungesa e demokracisë funksionale dhe trysnia qeveritare mbi median e lirë, kërkojnë rivendosjen sa më parë të institucionit të votës së lirë dhe drejtësinë e barabartë për të gjithë”.
Postimi i plotë
Pozicionimi i Shqipërisë në kategorinë e regjimeve të demokracive hibride nga ”Freedom House”, si dhe përkeqësimi i vlerësimit për qeverisjen demokratike dhe procesin zgjedhor, nxjerr qartë arsyet e vështirësimit në rrugën evropiane të Shqipërisë dhe shkaqet e emigracionit masiv të shqiptarëve.
Vlerësimet e ”Freedom House” e pasqyrojnë Shqipërinë si një pronë private të Edi Ramës, ku shteti i së drejtës është zëvendësuar me pushtetin e individit, i cili lartësohet mbi institucionet dhe rendin demokratik.
Rënia e nivelit të demokracisë në raportin e Freedom House, është një këmbanë alarmi për rrugën e vështirë në plotësimin e 15 kushteve të vendosura nga Bashkimi Evropian për çeljen e negociatave.
Rritja e vazhdueshme e tensionit social, rënia ekonomike, shpopullimi i vendit, mungesa e demokracisë funksionale dhe trysnia qeveritare mbi median e lirë, kërkojnë rivendosjen sa më parë të institucionit të votës së lirë dhe drejtësinë e barabartë për të gjithë.
