Presidenti Ilir Meta ndodhet sot në Kosovë ku dekoroi efektivat e FSK që morën pjesë në shpëtimin e qytetarëve nga rrënojat e tërmetit në Durrës dhe Thumanë.
Pasdite, kreu i shtetit është nisur drejt Prizrenit për të takuar qytetarët nga Shqipëria që janë strehuar në Kampin e Inovacionit. Presidenti Meta u takua me shqiptarët që ju shkatërruan banesat nga tërmeti i 26 nëntorit.
Kreu i shtetit bashkëbisedoi me ta për tejkalimin e situatës emergjente dhe rikthimin në normalitet. Gjithashtu kreu i shtetit u takua dhe falenderoi vullnetarët që po shërbejnë në Kampin e Inovacionit në Prizren. Në fjalën e tij, kreu i shtetit vlerësoi rolin e shtetit të Kosovës në përballimin e situatës në Shqipëri. Ai shprehu mirënjohje për drejtuesit e pushtetit vendor në Prizren që kanë përballur situatën me qytetarët e larguar nga zonat e prekura nga tërmeti.
Presidenti Meta ngushëllon familjen Abazi
Praditen e sotme, Presidenti i Republikës, Ilir Meta vizitoi dhe i shprehu ngushëllimet e sinqerta familjes Abazi në Gjilan, për ndarjen e parakohshme nga jeta të dy vëllezërve Shemsedin dhe Isa Abazi, të cilët humbën jetën për shkak të tërmetit të 26 nëntorit 2019. Pasi u takua me anëtarët dhe të afërmit e familjes Abazi, Presidenti i Republikës u shpreh: “Nuk mund të mos vija në Gjilan për të ndarë dhimbjen me familjen Abazi, për humbjen e pazëvendësueshme dhe të pangushëllueshme të dy njerëzve të tyre mjaft të dashur, pjesë e të gjitha atyre humbjeve tragjike njerëzore që pësuam me tërmetin e 26 nëntorit në Shqipëri. Me këtë ndjenjë solidariteti që ekziston mes dy vendeve tona, që është një ndjenjë tepër vëllazërore dhe njerëzore, dhimbja do të jetë më e lehtë dhe kjo familje do të ketë mundësi për ta përballuar atë me mbështetjen e të gjithë komunitetit, e veçanërisht të të gjithëve ne në Shqipëri dhe Kosovë, në mënyrë që të gjithë ata që humbën të afërmit e tyre, të ndiejnë mbështetjen dhe kujdesin tonë, për një të ardhme më të mirë. Ngushëllime edhe të gjithë komunitetit të mrekullueshëm të Gjilanit për këtë humbje të dy qytetarëve të nderuar!”.
