Akuzat ndaj Thaçit, politikanët ”rivalë” bëhet bashkë në mbrojte të UÇK-së

0 291

Situata politike në Kosovë, u trondit nga lajmi se zyra e Prokurorit të Specializuar në Hagë, ka ngritur akuza ndaj Presidentit Hashim Thaçi dhe kryetarit të PDK-së, Kadri Veseli, si të dyshuar për krime kundër njerëzimit dhe krime lufte ndër të cilat, vrasje të paligjshme, zhdukje e detyruar e personave, përndjekje dhe tortura. Sipas prokurorit akuzat janë ngritur më 24 prill.

Liderët politikë kanë lënë mënjanë interesat e tyre partiake në reagimet. Ish-kryeministrat Albin Kurti dhe Ramush Haradinaj si dhe ish-presidenti, Behgjet Pacolli shprehen të bindur në luftën e drejtë të UÇK-së.

“Populli shqiptar i Kosovës me të drejtë zhvilloi luftë për liri, pas shtypjes së egër nga regjimet e ndryshme serbe, që zgjati pothuajse një shekull, duke kulmuar me regjimin e Millosheviçit. Ushtria Çlirimtare e Kosovës ka bërë luftë të pastër, rezultat i së cilës ishte liria dhe themelimi i Republikës së Kosovës. Ne besojmë në pafajësinë e Presidentit Thaçi, kryetarit Veseli dhe të gjithë bashkëluftetarëve të tjerë”, shprehet Haradinaj.

“Kosova ka luftuar një luftë për çlirim dhe pavarësi kundër Serbisë. Gati një shekull ishim shtypur dhe vrarë nga Serbia. Ushtria Çlirimtare e Kosovës luftoi një luftë të drejtë. Unë besoj në pafajësinë̈ e Presidentit Hashim Thaçi dhe kryetarit Kadri Veselin. UÇK-ja luftoi një luftë të drejtë. Ne të gjithë besojmë në pafajësinë e ushtarëve tanë”, thotë Pacolli.

Sipas Albin Kurtit, i cili me Hashim Thaçin janë kundërshtarë të fortë në politikë, akuzat dëmtojnë reputacionin e Kosovës dhe gjykimi nuk mund të vijë nga jashtë por duhet bërë në Kosovë nga institucionet e saj.

“UÇK-ja është luftë kundër një agresori dhe okupatori i cili kishte kryer gjenocid në vendin tonë dhe luftëtarët e lirisë, veteranët e invalidët e UÇK-së edhe politikisht e historikisht janë në të drejtën e tyre. S’do mend që ngritja e aktakuzës e dëmton reputacionin e Kosovës. Besoj në pafajësinë e UÇK-së dhe mendoj që Kosova është dashur qysh moti ta ketë gjyqësinë e vet të pavarur e të paanshme që të hetoj e dënoj krimet e luftës e mbi të gjitha ato që janë shkaktuar nga Serbia në Kosovë”, ka deklaruar ish-kryeministri Kurti.

Leave A Reply

Your email address will not be published.